ميرزا الغ بكك ايلچيلرى سلطان شاه و محمد بدخشى مقدما روانه اولوب ميرزا ابراهيم سلطانك ايلچيسى هنوز و اصل اولمامشيدى . ماه شعبانك اون سكزنجى كونى اول سرحدك كه آندن سكجو شهرينا وارنجه طقوز منزل ايدى . ختاى پادشاهى طرفندن حاكمى اولوب بش آلتى بيك مقدارى سوارى ايله ايلچيلرك استقبالنه كلان دانك راچى طرفندن ايلچيلر ضيافت پادشاهى يه دعوت اولنمغله ايلچيلرك جمله‌سى سوار اولوب دانك راچىنك يوردينه واريلدى . ختاييلر يوردلرينى چاركوشه قوروب اطرافى كويا پركارله چيزيلمش كبى هموار ايتمشلر و جوانب اربعه‌ده برر يول آليقويوب چادرلرك طنابلرينى بربرينه اولمقوله بند ايتمشلر ايدى كه پياده آدم ايچر و كيرمك ممكن اولمازدى و مياننده بربيوك ميدان آليقويوب اول ميدانك اورته سنده بر دونم مقدارى صفه ايدوب مقابلنه بر بيوك ختايى چادر قورمشلر . و دامانلرينى قالديروب اغاجدن بر سرير ياپمشلر ايدى . و بزدن سايبانلر قوروب تمام اول ميدانى سايه‌دار قلمشلر ايدى راچينك صندليسنك ايكى جانبنه صندليلر قونيلوب اهالئ ختاى بينلرنده صول طرفك اعتبارى زياده اولمغله ايلچيلر صول طرفده‌كى صندليلرده و ختاى امراسى صاغ طرفده‌كى صندليلرده اوتورديلر . بعده ايلچيلر و امرادن هر كسك اوكنه ايكيشر خوان قوديلر كه بررينك اوزرينه پيشمش قاز و قوش اتلرى